Kajajiyang 7

7:1 Nanakkedana PUWANGNGE lao ri Nuh, “Uwitai makkedaé iko alé-aléna tau iya pogau’éngngi élo-Ku. Jaji, uttama’no ri laleng kappala’éro silaong sininna kaluwargamu.
7:2-3 Tiwii towi pituppasang polé ri tungke rupanna manu’-manu’ sibawa olokolo laingngé iya hallala’é, naiya harangngé banna sipasang bawang polé ri tungke rupanna. Pogau’i iyaro kuwammengngi polé ri tungke rupanna olokolo’é engka iya leppe’é polé ri abinasangngé sibawa weddingngi mabbija-bijasi ri linoé.
7:4 Pitungngessopi Upateppai matu bosi iya dé’é matu nasoro patappulo esso patappulo wenni ittana, kuwammengngi nasininna mahlu’ tuwoé iya puraé Upancajiro binasai.”
7:5 Nanapogau’ni Nuh sininna iya napparéntangngé PUWANGNGE lao ri aléna.
7:6 Umuru’na Nuh 600 taung wettunna kajajiyang lémpe’ rajaé ri linoé.
7:7 Nuh sibawa bainéna, sibawa ana’-ana’na silaong sining bainéna mennang, muttama’ni ri laleng kappala’éro untu’ passalama’i aléna polé ri lémpe’é.
7:8 Sikaju lai sibawa sikaju komba polé ri tungke rupanna manu’-manu’é sibawa olokolo laingngé — muwi iya hallala’é iyaré’ga iya harangngé —
7:9 muttama’ni ri laleng kappala’éro silaong sibawa Nuh, situru sibawa paréntana Allataala.
7:10 Pitungngesso ri munrinna poléni lémpe’é mappo’i linoé.
7:11 Wettunna Nuh makkéumuru 600 taung, ri tanggala seppulona pitu uleng duwa, mareppa’ni sininna mata uwaié ri yawana linoé. Sininna tange uwaié ri langié tattimpa’ni,
7:12 nateppana bosié patappulo esso patappulo wenni ittana.
7:13 Iyatoro essoé, Nuh sibawa bainéna muttama’ni ri laleng kappala’éro silaong iya tellu ana’na, iyanaritu Sém, Yafét sibawa Ham enrengngé sining bainéna mennang.
7:14 Nasibawang mennang muttama’ toni tungke rupanna manu’-manu’é sibawa olokolo laingngé, muwi iya makacuwaé iyaré’ga iya maliyaé, iya battowaé iyaré’ga baiccu’é.
7:15 Sikaju lai sibawa sikaju komba polé ri tungke rupanna mahlu’ tuwoé muttama’ni ri laleng kappala’éro silaong sibawa Nuh,
7:16 situru sibawa paréntana Allataala lao ri aléna. Muttama manennana, natongkoni PUWANGNGE sumpanna kappala’é.
7:17 Iyaro lémpe’é matterui mangalle patappulo esso ittana, sibawa cuku’ tanréna uwai angkanna iyaro kappala’é weddingngi monang.
7:18 Napédé matanré uwaié, nataronakkonanna iyaro kappala’é ri tompo’na uwai.
7:19 Napédé tattamba tanréna iyaro uwaié, angkanna nalle’ni sining bulu iya kaminang matanré.
7:20 Natteru ménré uwai lettu narapi pitu météré tanréna ri yasé’na coppo-coppo bulué.
7:21-23 Napabbinasani PUWANGNGE sininna mahlu’ iya tuwoé ri linoéwé: Tolinoé, manu’-manu’é sibawa olokolo pottanangngé muwi baiccu iyaré’ga battowa. Iya dé’é nabinasa banna Nuh sibawa sininna iya engkaé silaong aléna ri laleng kappala’éro.
7:24 Iyaro uwai dé’ naengka nanonno 150 esso ittana.

Advertisements

Leave a comment

Filed under Perjanjian Lama

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google+ photo

You are commenting using your Google+ account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s