Kajajiyang 41

41:1 Labe’nana duwattaung, mannippini arung Maséré, naitai aléna tettong ri wirinna Salo Nil.
41:2 Tappa engka pitukkaju saping iya macommo’é sibawa nrelli olina, massu polé ri saloéro nainappa mammula manré wella ri wirinna saloéro.
41:3 Nainappa pitu saping iya laingngngé mompo toni; iyaro sining olokolo’é makojo sibawa buku mani nadoko oli. Iyaro sining saping iya makojoé tettongngi ri benrénna sining saping iya macommo’é, ri wirinna saloé.
41:4 Nainappa sining saping iya makojoé manréi sining saping iya macommo’é. Purairo péseddinni arungngé polé ri tinrona.
41:5 Nainappa matinro sibawa mannippisi. Ri laleng nippinnaro naitai pitu lice’ gandong iya mallise’é sibawa macuwa taggattung riséddié ulé.
41:6 Nainappa momposi pitu lice’ gandong iya laingngé, iya makapaé sibawa makkapuru nataro anging padang kessi’é.
41:7 Nainappa lice’ gandong iya makapaéro memme’i iya pitu lice’ gandong iya malise’é onna. Purairo péseddinni arungngé sibawa namaingekinna makkedaé purai mannippi.
41:8 Elénana maséssani arungngé, rimakkuwannaro nasuroni mobbii sininna passéhéré’é sibawa tau maccaé ri Maséré. Nainappa nacurita nippinna lao ri mennang, iyakiya dé’ muwi séddi tau mulléi pakatajangngi bettuwanna.
41:9 Nainappa makkeda pangurusu énungengngé lao ri arungngé, “Iyaé essoé harusu’i atatta nangakui asalanna atatta.
41:10 Riyolo macaii Datué lao ri pangurusu rotié sibawa lao ri atatta, nainappaki riputtama ri laleng tarungkué, ri bolana kapala pengawal saorajaé.
41:11 Riséuwaé wenni mannippi duwaki, na iyaro nippitta dé’ napada bettuwanna.
41:12 Engka séddi kallolo Ibrani kuwaro sibawakki. Pattumaninnai kapala pengawalna saorajaé. Ricuritangngi nippitta lao ri aléna, nainappa napakatajang bettuwanna iyaro nippié.
41:13 Annessana kajajiyang manengngi pada-pada iya napowadaé, iyanaritu: Napalisui Datu atanna lao ri jama-jamanna atatta pammulanna, iyakiya nahukkung matéi pangurusu rotiéro.”
41:14 Nanassurowanni arungngé malai Yusuf, namasitta’na ripassu polé ri tarungkué. Puranana Yusuf maccukkuru sibawa sulléiwi pakéyanna, mangoloni ri arungngé.
41:15 Nakkeda arungngé ri aléna, “Puraka mannippi, nadé’gaga séddi tau mulléi pakatajangngi bettuwanna. Engka mabbirittangngi ri iyya makkedaé mulléi pakatajangngi nippié.”
41:16 Nappébali Yusuf, “Tenniya atatta, Puwakku, sangadinna Allataala iya mpéréngngékka matu pappakatajang iya tongengngé.”
41:17 Nanakkeda arungngé, “Mannippika tettokka ri wirinna Salo Nil.
41:18 Namassuna polé ri saloéro pitu saping iya macommo’é sibawa nrelli olina, nainappa mappammula makkinanré ri wirinna saloéro.
41:19 Nainappa momposi paimeng pitu saping iya laingngé, iya makojoé sibawa buku mani nadoko oli. Dé’pa naengka uwita saping makkuwaé mani jana tappana risininna Maséré.
41:20 Iyaro sining saping iya makojoé naanréi gangka cappu iya pitu saping iya macommo’é onna.
41:21 Iyakiya puranaro iyaro sining saping iya makojoé tette mupi makojo. Nanaupéseddinna polé ri tinroku.
41:22 Nainappaka matinro sibawa mannippisi, mitaka pitu lice’ gandong iya mallise’é sibawa matasa, taggattung riséddié ulé.
41:23 Nainappa mompoto pitu lice’ gandong iya kapaé sibawa makkapuru nataro anging padang kessi’é.
41:24 Iyaro lice’ gandong iya makapaé naemme’i lice’ gandong iya mallise’é onna. Purani ucurita iya duwa nippikkuro lao risining passéhéré’é, iyakiya dé’ muwi séddi tau mulléi pakatajangngi bettuwanna.”
41:25 Nanakkeda Yusuf lao ri arungngé, “Iya duwa nippiéro pada-padai bettuwanna; Allataala pura mappaissengengngi lao ri Puwakku aga maélo napogau’.
41:26 Pitu saping iya macommo’éro iyanaritu pituttaung, sibawa pitu lice’na gandong iya mallise’éro iyanaritu pituttautto; iya duwa padai bettuwanna.
41:27 Pitu saping iya makojoé, iya mompoé rimunri, enrengngé pitu lice’ gandong iya makapaé sibawa makkapuru’é nasaba anging padang kessi’éro iyanaritu wettu akkadéreng pituttaung ittana.
41:28 Pada-pada pura napowadaé atatta lao ri Puwakku, Allataala pura mappaitangngi lao ri Puwakku aga iya maéloé napogau’.
41:29 Maéloi matti polé pituttaung wettu adécéngengngé risininna wanuwa Maséré.
41:30-31 Purairo poléi matu pituttaung akkadérengngé, naiyaro wettu pennoé adécéngeng riyallupai sisengngi matu, nasaba wettu akkadérengngéro masero senna’i matu angkanna iyaé wanuwaé mancaji makabuttui.
41:32 Nippinna Puwakku kajajiyangngi wékkaduwa, bettuwanna iyaro makkedaé iyaro gau’é purani napattentu Allataala sibawa masitta’na maélo napajoppa Allataala.
41:33 Rimakkuwannanaro, makessingengngi Puwakku pilé séddi tau iya maccaé nenniya mapanré sibawa wéréngngi akuwasang untu’ matoro’i iyaé wanuwaé.
41:34-35 Harusu towi Puwakku makka pegawé-pegawé laingngé, sibawa wéréngngi mennang akuwasang untu’ léléi tawa limanna polé ri sininna éngngalang gandongngé ri wettu iya pennoéro adécéngeng pituttaung ittana, nainappa goppoi ri kota-kotaé enrengngé jagaiwi.
41:36 Iyaro gandongngé mancajiwi bokong inanré ri wettu akkadérengngé pituttaung ittana iya maéloé polé ri Maséré. Nanallalengiwi dé’na namaté temmanré ra’ya’é.”
41:37 Nasitujuini arungngé sibawa sining pegawénna iyaro rancanana Yusuf.
41:38 Nanakkeda arungngé lao ri mennang, “Dé’ namakkullé lolongekki tau laing iya lebbi coco’é naiya Yusuf, saba’ ripimpingngi ri rohna Allataala.”
41:39 Namakkeda arungngé lao ri Yusuf, “Allataala pura paissengi manekko iyaé lao ri iko, jaji manessani makkedaé lebbi maccako nenniya mapanré naiya muwi niga.
41:40 Maéloka makkako mancaji gubernur, nasininna ra’ya’ku naturusiwi matu paréntamu. Banna iyya bawang iya lebbi makuwasaé naiya iko.”
41:41-42 Purairo naludunni arungngé polé ri jarinna ciccing iya risobbi’é ca’ akkarungengngé, nainappa napasang ri jarinna Yusuf namakkedato, “Nasibawang iyaé uwakkako mancaji gubernur ri sininna Maséré.” Nainappa napapasangi Yusuf séuwa jumba lénang iya alusu’é, sibawa napaggénoiwi ellonna séddi ranté ulaweng.
41:43 Nanawérénni Yusuf karéta akkarungeng maduwaé untu’ tonangenna, enrengngé pengawal alebbirenna arungngé joppa ri yolona karétaéro nagora-gorato, “Jagako! Wéréngngi laleng! Wéréngngi laleng!” Makkuwaniro Yusuf riyakka mancaji gubernur sininna Maséré.
41:44 Nakkeda arungngé lao ri aléna, “Iyya’na arung — na iyya mappallebbangengngi makkedaé dé’ muwi séddi tau risininna Maséré wedding pogau’ agi-agi rékko dé’ mupalaloi.”
41:45-46 Nainappa arungngé nawéréng séddi aseng Maséré lao ri Yusuf, iyanaritu Zafnat-Paanéah. Nawéréng toni séddi bainé iya riyasengngé Asnat, ana’na Potiféra iya mancaji imangngé ri kota Héliopolis. Telluppulo taung umuru’na Yusuf wettunna mappammula majjama untu’ arung Maséré. Najoppana Yusuf polé ri saorajana arungngé nanalao mattulilingiwi sininna wanuwaé.
41:47 Ri laleng wettu pituttaungngé bujuru iyaro adécéngengngé, powassélé’i tanaé éngngalang maona.
41:48 Napaddeppungenni Yusuf iyaro gandongngé nainappa nataro ri kota-kotaé. Ri laleng tungke kota taroi gandong wassélé sining dare’é ri seddéna kotaéro.
41:49 Iyaro gandong napaddeppungengngé makkuwamani égana angkanna mappésauni Yusuf mola’i, nasaba égana pada-padai kessi’é ri wiring tasi’é.
41:50 Ri wettu dé’napa napolé akkadérengngéro, Asnat bainéna Yusuf jajiyanni duwa ana’ worowané.
41:51 Nakkeda Yusuf, “Allataala pura mébbuka mallupaiwi sininna anrasa-rasakku sibawa lao ri kaluwargana ambo’ku.” Rimakkuwannanaro nasenni ana’na iya mammulangngé “Manasyé”. *Manasyé: Iyaé asengngé oninna pada-pada ada Ibrani iya bettuwanna “mébbui takkalupa”.*
41:52 Makkeda towi, “Allataala pura mpérékka ana’-ana’ ri laleng wettu asukkarakekku,” nanasenni ana’na iya maduwaé “Efraim”. *Efraim: Iyaé asengngé oninna pada-pada ada Ibrani iya bettuwanna “mpéréngngi ana’-ana'”.*
41:53 Pituttaung wettu sukkué adécéngenna iya puraé napéneddingi wanuwa Maséré’ro labe’ni.
41:54 Napoléna pituttaung wettu akkadérengngé, pada-pada iya puraé napowada Yusuf. Risininna linoé kajajiyangngi akkadérengngé, iyakiya risininna Maséré engka bokong inanré.
41:55 Wettunna ra’ya’ Maséré’é mammula makkadéreng, méllauni mennang inanré ri arungngé. Nainappa arungngé suroi mennang lao ri Yusuf sibawa turusiwi sininna aga iya napparéntangngé matu Yusuf lao ri mennang.
41:56 Wettunna iyaro akkadérengngé pédé masero sibawa massanrani risininna wanuwaé, natimpa’ni Yusuf sininna gudangngé sibawa balu’i gandongngé lao ri tau Maséré’é.
41:57 Polé risininna linoé pada poléni tauwé ri Maséré untu’ melli gandong ri Yusuf, nasaba iyaro akkadérengngé masero tongeng kégi-kégi.

Advertisements

Leave a comment

Filed under Perjanjian Lama

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google+ photo

You are commenting using your Google+ account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s