Kajajiyang 1

1:1 Pammulanna, wettunna Allataala mammula pancajiwi sininna alangngé, *Pammulanna, wettunna Allataala … sininna alangngé, iyaré’ga: Ri wettu pammulanna Allataala pancajiwi sininna alangngé.*
1:2 iyaro linoé dé’pa nakkérupa, sibawa sigaru-garu mupi. Naiyaro tasi’ lowangngé mabbombangngi, iya tongkoéngngi sininna séuwa-séuwaé, nassanraiwi pettang kape’, iyakiya akuwasanna Allataala *Akuwasanna Allataala: Ri laleng basa Ibrani wedding towi ribettuwangi sibawa Rohna Allataala iyaré’ga anging polé ri Allataala iyaré’ga anginraja.* kédo-kédoi ri tompo’na uwai.
1:3 Nakkedana Allataala, “Ancajino tajang!” Naengkana tajangngé.
1:4 Namasennanna Allataala mitai gau’éro. Nanapassaranni iyaro tajangngé polé ri pettangngé.
1:5 Nanasenni Allataala iyaro tajangngé “Esso” sibawa pettangngé “Wenni”. Nalabe’na wennié, nancajina éléé. Iyanaro esso mammulangngé.
1:6-7 Nanakkeda Allataala, “Ancajino séuwa kubah untu’ bagéi uwai mancaji duwa, sibawa tahangngi ri laleng duwa onrong mallaisengngé.” Nakajajiyanna gau’éro. Makkuwaniro Allataala pancajiwi kubah-é iya passarangngéngngi uwai iya engkaé ri yawana sibawa ri yasé’na.
1:8 Nanasenni Allataala iyaro kubah-é “Langi”. Labe’ni wennié nancajina éléé. Iyanaro esso maduwaé.
1:9 Nanakkeda Allataala, “Sitinajai sininna uwai iya engkaé ri yawana langié maddeppungengngi riséddié onrong, kuwammengngi napaita tanaé.” Nakajajiyanna gau’éro.
1:10 Nasenni Allataala iyaro tanaé “Pottanang”, sibawa nasenni “Tasi” iyaro uwai maddeppungengngé. Namasennanna Allataala mitai gau’éro.
1:11 Nanakkedana Allataala, “Sitinajai iyaro tanaé natuwongngi sakke rupa tanet-taneng, iya powassélé’é lise’-lise’ sibawa iya powassélé’é buwa-buwa.” Nakajajiyanna gau’éro.
1:12 Makkuwaniro tanaé natuwongngi sininna sakke rupaé tanet-taneng. Namasennanna Allataala mitai gau’éro.
1:13 Labe’ni wennié nancajina éléé. Iyanaro esso matellué.
1:14-15 Nanakkeda Allataala, “Sitinajai engka anu macakka ri langié untu’ tajangiwi linoé, untu’ passarangngi essoé sibawa wennié, sibawa untu’ mappaitangngi wettu mappammulana essoé, taungngé sibawa esso maraja agamaé.” *Esso maraja agamaé iyaré’ga wettu.* Nakajajiyanna gau’éro.
1:16 Makkuwaniro Allataala pancajiwi iya duwa anu macakka iya battowaé, iyanaritu mataesso untu’ makuwasaiwi essoé, sibawa kéteng untu’ makuwasaiwi wennié; ri lainnaéro naébbu towi sining wéttowingngé.
1:17 Nataroni Allataala iyaro anu macakkaé ri langié untu’ tajangiwi linoé,
1:18 untu’ makuwasaiwi essoé sibawa wennié, enrengngé untu’ passarangngi tajangngé polé ri pettangngé. Namasennanna Allataala mitai gau’éro.
1:19 Labe’ni wennié nancajina éléé. Iyanaro esso maeppaé.
1:20 Nanakkeda Allataala, “Sitinajai ri laleng uwai maddeppungeng maéga rupanna anu tuwo, sibawa ri elle’é makkaluttureng maéga manu’-manu’.”
1:21 Nanapancajini Allataala olokolo battowaé ri tasi’é, sininna rupanna anu iya tuwoé ri laleng uwai, enrengngé sininna rupanna manu’-manu’é. Namasennanna Allataala mitai gau’éro.
1:22 Nabarakkakini Allataala iya manennaro sibawa nawérénna parénta anu iya tuwoé ri laleng uwai kuwammengngi nabbija-bija sibawa pennoiwi tasi’é, enrengngé lao ri manu’-manu’é kuwammengngi natattamba maéga.
1:23 Labe’ni wennié nancajina éléé. Iyanaro esso malimaé.
1:24 Nanakkeda Allataala, “Sitinajai linoé passui sininna rupanna olokolo ri pottanangngé, iya makacuwaé sibawa iya maliyaé, battowa iyaré’ga baiccu.” Nakajajiyanna gau’éro.
1:25 Makkuwaniro Allataala mébbui iya manennaro namasennanna mitai gau’éro.
1:26 Nanakkeda Allataala, “Makkekkuwangngé maéloki mébbui rupatauwé iya mancajiyé matu pada-pada Idi sibawa sinrupa Idi. Makuwasai matu mennang risining balé, manu’-manu’é, sibawa sininna olokolo laingngé, muwi makacuwa iyaré’ga maliya, *Engka séddi bettuwang mariyolo: olokolo laingngé, muwi makacuwa iyaré’ga maliya; Ibrani: olokolo makacuwa sibawa sininna linoé.* muwi battowa iyaré’ga baiccu.”
1:27 Makkuwaniro Allataala pancajiwi rupatauwé, sibawa napancajiwi mennang pada-pada Aléna muto. Napancajiwi mennang worowané sibawa makkunrai.
1:28 Nainappa nabarakkakiwi mennang sibawa makkeda, “Akkéana’ eppono iya maégaé, kuwammengngi wija-wijammu monroiwi sininna linoé enrengngé makuwasaiwi. Uwérékko tugas murusu’i sining balé, manu’-manu’é, sibawa sininna olokolo laing iya maliyaé.
1:29 Untu’ inanrému Uwérékko sininna rupanna tanet-taneng iya powassélé’é lise’-lise’ sibawa buwa-buwa.
1:30 Iyakiya lao ri sininna manu’-manu’é sibawa olokolo maliya laingngé, Uwéréngngi wellaé sibawa tanet-taneng maddaungngé selaku inanréna.” Nakajajiyanna gau’éro.
1:31 Naitani Allataala sininna séuwa-séuwa iya puraé naébburo, namasennang senna’na. Labe’ni wennié nancajina éléé. Iyanaro esso maennengngé.

Advertisements

Leave a comment

Filed under Perjanjian Lama

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google+ photo

You are commenting using your Google+ account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

w

Connecting to %s