Assureng 19

19:1-2 Purairo nasalaini bangsa Israélié Rafidim, na ri tanggala séddi uleng matellué nasalainnana mennang Maséré, lettu’ni ri padang kessi Sinai. Makkémani mennang ri ponna Bulu Sinai,
19:3 na Musa tuppuiwi iyaro bulué untu’ siruntu sibawa Allataala. Mabbicarani PUWANGNGE polé ri buluéro sibawa suroi mappallebbangengngi lao ri tau Israélié, wija-wijanna Yakub,
19:4 “Purani muwita aga Napogau’ lao ri tau Maséré’é, sibawa pékkugi-Ka tiwiko lao ri Iyya ri onrongngéwé nasibawang akuwasang battowa, pada-pada kuwajangngé tiwii ana’na ri yasé’na pannina.
19:5 Makkekkuwangngé rékko muturusi-Ka sibawa matinulu lao ri assijancik-Ku, Upancajiko matu umma riyalé-Ku. Sininna linoé iyanaritu appunnangek-Ku, iyakiya iko mancajiko appunnangeng uwélorik-Ku,
19:6 mallaing untu’ alé-Ku muto, na iko tumaningi-Ka matu selaku imang-ngimang.”
19:7 Nanonnona Musa sibawa mobbii sining pamimpingngé kuwammengngi naddeppungeng, nainappa nacuritang mennang sininna séuwa-séuwaé iya napparéntangngé PUWANGNGE lao ri aléna.
19:8-9 Mappébalini mennang massama-samang, “Maéloki pogau’i sininna iya napowadaé PUWANGNGE,” na iyaro pappébalié napalettu’ni Musa lao ri PUWANGNGE. Nanakkeda PUWANGNGE lao ri Musa, “Maélo-Ka polé ri iko tattongko ri laleng ellung iya makkompe’é; naéngkalinga-Ka matu tauwé mabbicara lao ri iko, namappammulai wettuéro tuli mateppe’ni matu mennang ri iko.
19:10 Makkekkuwangngé sitano sining tauwéro, namusuroi iyaé essoé sibawa baja passadiyai aléna untu’ massompa. Harusu’i mennang sessa’i pakéyanna.
19:11 Harusu’i mennang sadiyana sangadi. Iyaro essoé maélo-Ka nonno ri tompo’na Bulu Sinai, onrong weddingngé naitaka sininna tauwé.
19:12 Ebbuno tanrang ri mattulilinna buluéwé selaku pakkaséséng iya dé’é nawedding naliweng iyaro bangsaé. Attéyangngi iyaro bangsaé tuppuiwi bulué, mala maddeppériwi. Nigi-nigi léttoi pakkasésénna, rihukkung matéi matu;
19:13 iyaro tauwé harusu’i rigenrung batu iyaré’ga ripana, sibawa dé’ nawedding rigéssa. Iyaé takkennai muwi lao ri tolinoé iyaré’ga untu’ olokolo’é; sininna iya liwengngéngngi iyaro pakkaséséngngé harusu’i rihukkung maté. Wettunna muwéngkalinga oni tarompé malampéé, iyaro sining tauwé harusu’i tuppuiwi bulué.”
19:14-15 Nainappa nonno Musa polé ri bulué sibawa suroi sining tauwéro sadiya-sadiya untu’ massompa. Adanna, “Harusu’ko sadiya sangadi, sibawa makkekkuwangngé dé’ naweddikko siluséreng.” Nasadiya-sadiyana iyaro bangsaé sibawa sessa’i pakéyanna.
19:16 Ri éléna ri esso matellué engka guttu sibawa letté. Momponi ellung iya makkompe’é ri tompo’na bulué sibawa riyéngkalingani oni tarompé iya maladde senna’é. Sininna tauwé ri akkémangngé ténréni nataro tau.
19:17 Natiwini Musa mennang massu untu’ sita sibawa Allataala, nainappa tettong ri ponna buluéro.
19:18 Natongko manenni rumpu Bulu Sinai, nasaba nonnoi PUWANGNGE ri tompo’na ri laleng apié. Iyaro rumpué maddumpuni pada-pada rumpu polé ri onrong attunungngé, sibawa taggottanni masero senna sininna bulué.
19:19 Pédé maladde’i oni tarompé’é. Mabbicarani Musa, na Allataala baliwi sibawa guttu.
19:20 Nonnoni PUWANGNGE ri tompo’na Bulu Sinai, sibawa mobbii Musa untu’ ménré ri tompo’na buluéro. Nanatuppuna Musa,
19:21 namakkeda PUWANGNGE lao ri aléna, “Nonnono namuparéngngerangiwi sining tauwéro makkedaé dé’ nawedding mennang liwengngi pakkaséséngngé untu’ mita-Ka. Rékko naliwengngi mennang, maéga maté matu ri yelle’na.
19:22 Mala sining imang iya maéloé maddeppérika, harusu’i pépaccingiwi aléna; rékko dé’, Uhukkungngi matu mennang.”
19:23 Nakkeda Musa lao ri PUWANGNGE, “Iyaro sining tauwé dé’ nawedding ménré, saba’ muparéntakki untu’ mangga’i iyaé buluéwé selaku onrong iya mapaccingngé sibawa pénessaiwi pakkasésénna ri mattulilinna.”
19:24 Nappébali PUWANGNGE, “Nonnono, nainappa lisu kuwaé silaong Harun. Iyakiya sining imang sibawa ra’ya’é dé’ nawedding naliweng pakkaséséngngé untu’ lao ri Iyya. Rékko naliwengngi, Uhukkungngi matu mennang.”
19:25 Nananonnona Musa méwai sita bangsaéro sibawa napalettu’ni pasenna PUWANGNGE lao ri mennang.

Advertisements

Leave a comment

Filed under Perjanjian Lama

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google+ photo

You are commenting using your Google+ account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s