Angimangeng 11

11:1 PUWANGNGE mabbéréyangngi lao ri Musa sibawa Harun iyaé sining peraturangngé
11:2-3 untu’ bangsa Israélié. Sininna olokolo tuwoé ri pottanangngé iya tuli malléroé sibawa mapuwé’é kanukunna iyanaritu hallala’i sibawa wedding riyanré.
11:4-6 Aja’ muwanré unta, palando iyaré’ga kalinci. Iyaro olokolo’é harangngi, nasaba namuni tuli malléroi, iyakiya dé’ namapuwé’ kanukunna.
11:7 Aja’ muwanré bawi. Iyaro olokolo’é harangngi, nasaba namuni mapuwé’i kanukunna, dé’ natuli malléro.
11:8 Dé’ nawedding riyanré jukuna sibawa muwi bakkéna dé’to nawedding rigéssa nasaba iyaro olokolo’é harangngi.
11:9 Weddikko manréi sininna rupanna balé iya masséréé sibawa massessi’é.
11:10-12 Olokolo iya tuwoé ri laleng uwai iyakiya dé’ nasséré sibawa dé’ nassessi iyanaritu harangngi, jaji dé’ nawedding riyanré, sibawa dé’ nawedding rigéssa bakkéna.
11:13-19 Ri yelle’na manu’-manu’é, iyanaé dé’ nawedding riyanré nasaba najisi’i: kuwajangngé, kacoci’é, sininna rupanna bokangngé, nazar-é, kaokaoé, manu’-manu’ untaé, bokang tasi’é, campongngé sibawa sininna rupanna coko’é, bannya liyaé, manu’-manu’ kasaé sibawa panningngé.
11:20 Sininna rupanna béré-béré iya makkalolo’é iyanaritu harangngi,
11:21 sangadinna iya naullé luppe.
11:22 Jaji incalé, jangkaré’é, incalé manyilaé wedding riyanré.
11:23 Iyakiya sininna rupanna béré-béré laingngé iya makképannié sibawa iyato makkalolo’é iyanaritu harangngi.
11:24-28 Séddié tau mancaji najisi’i narapi labu essoé rékko géssai bakké sala sikajunna olokolo’éwé: olokolo iya makkanukué, sangadinna iya mapuwé’é kanukunna enrengngé malléroé, sibawa olokolo iya eppaé ajéna sibawa engka pakkarebbéna. Nigi-nigi tiwi bakké olokolo pada-padaéro harusu’i sessa’i pakéyanna, iyakiya najisi’ mupi narapi labu essoé.
11:29-30 Balawo tanaé, balawo loppoé, balawo baiccu’é, buccili’é, sininna rupanna cuppangngé, landa’é, pararangngé, piccaraé, bojoé sibawa caccaleppéé iyanaritu harangngi.
11:31 Nigi-nigi géssai iyaro olokolo’é iyaré’ga bakkéna mancaji najisi’i narapi labu essoé.
11:32 Rékko iyaro bakké olokolo’é sempé’i riséddié barang, iyaro barangngé mancaji najisi’i. Iyaro gau’é kajajiyangngi untu’ sininna rupanna barang polé ri ajué, kaingngé, bingkulangngé, iyaré’ga kaing karungngé, dé’ namancaji soal untu’ aga iyaro barangngé ripaké. Iyaro barangngé harusu’i riremmé ri uwai, iyakiya tette’i najisi’ narapi labu essoé.
11:33 Rékko iyaro bakké sempé’i ri laleng oring tanaé, sininna iya engkaé ri lalenna oringngéro mancaji najisi’i, sibawa iyaro oringngé harusu’i rireppa.
11:34 Anrékanré iya nakennaé uwai polé ri oringngéro mancaji najisi’i, sibawa énungeng iya engkaé ri laleng oringngéro mancaji najisi’ towi.
11:35 Agi-agi iya nageppaé iyaro bakké mancaji najisi’i. Dapo iyaré’ga onrong attunung polé ri tanaé iya nakennaé bakkéro harusu’i rireppa nasaba najisi’i.
11:36 Sangadinna mata uwai iyaré’ga bujungngé, sininna iya laingngé mancaji najisi’i rékko nakennai bakké.
11:37 Rékko iyaro bakké sempé’i ri yasé’na biné iya maéloé riyampo, iyaro biné tette’i mapaccing.
11:38 Iyakiya rékko iyaro biné mattengngangngi riremmé ri laleng uwai nainappa nasempéki iyaro bakké, iyaro biné mancaji najisi’i.
11:39 Nigi-nigi géssai bakké olokolo iya hallala’é mancaji najisi’i narapi labu essoé.
11:40 Tau iya tiwiéngngi iyaré’ga manréi iyaro bakké harusu’i nasessa pakéyanna, iyakiya tette’i najisi’ narapi labu essoé.
11:41-42 Sininna olokolo iya mpekke’é ri tompo’na tanaé, muwi iya makkalolo’é, iya eppaé ajéna iyaré’ga maégaé ajéna, iyanaritu harangngi sibawa dé’ nawedding riyanré.
11:43 Aja’ mupanajisi’i alému sibawa manréi olokolo makkuwaéro rupanna.
11:44 Iyya’na PUWANG Allataalamu, rimakkuwannanaro jagako kuwammengngi tette’ko mapaccing, nasaba Iyya mapaccing.
11:45 Iyya’na PUWANG iya tiwiékko massu polé ri Maséré, kuwammengngi weddikka mancaji Allataalamu. Sitinajako mapaccing, nasaba mapaccikka.
11:46 Iyanaro peraturanna passalenna olokolo’é, muttama’ni manu’-manu’é, olokolo iya tuwoé ri uwai sibawa iya mpekke’é ri tompo’na tanaé.
11:47 Harusu’ko mulléi pasilaingengngi iya mapaccingngi sibawa iya najisi’é, ri yelle’na olokolo iya weddingngé riyanré sibawa olokolo iya dé’é nawedding riyanré.

Advertisements

Leave a comment

Filed under Perjanjian Lama

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google+ photo

You are commenting using your Google+ account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s